नवीदिल्ली : वृत्तसंस्था
महागाईच्या दणक्याने ऑक्टोबर महिन्याची सुरुवात झाली आहे. कारण महिन्याच्या सुरुवातीलाच एलपीजी सिलिंडरच्या किमती वाढवण्यात आल्या आहेत. ऑईल मार्केटिग कंपन्यांनी व्यावसायिक एलपीजी गॅस सिलिंडरच्या किमतीत मोठी वाढ केली असून त्याअंतर्गत 19 किलो वजनाचा एलपीजी गॅस सिलिंडर 209 रुपयांनी महागला आहे. ऑक्टोबर महिन्यात नवरात्रोत्सव आणि दसऱ्यासारखे सण आहेत. अशातच तेलाच्या किमती वाढवल्याने याचा सामान्य नागरिकांवर मोठा परिणाम होणार आहे.
दरम्यान, 209 रुपयांच्या वाढीनंतर नवी दिल्लीत 19 किलोच्या एलपीजी गॅस सिलिंडरची किंमत 1,731.50 रुपये इतकी होणार आहे. गेल्या महिन्यात 1 सप्टेंबर रोजी व्यावसायिक एलपीजी गॅस सिलिंडरच्या किमतीत 157 रुपयांची कपात करण्यात आली होती. आता एका महिन्यातच सिलिंडरच्या किमतीत 209 रुपयांची वाढ करण्यात आली आहे.
सप्टेंबरमध्ये सिलिंडरच्या किमतीत कपात करण्यात आल्यानंतर याच 19 किलोच्या व्यावसायिक एलपीजी गॅस सिलिंडरची 1,522 रुपयांमध्ये विक्री केली जात होती. आता यात 209 रुपयांची वाढ झाल्यानंतर याच सिलिंडरसाठी 1,731 रुपये मोजावे लागणार आहेत. कोलकात्यात या सिलिंडरची 1,636 रुपयांमध्ये विक्री होईल, तर चेन्नईत याच सिलिंडरसाठी 1,898 रुपये मोजावे लागणार आहेत. मुंबईत 19 किलोच्या व्यावसायिक एलपीजी गॅस सिलिंडरची किमत 1,482 रुपयांवरून 1,684 रुपये इतकी करण्यात आली
आहे.
1731 रुपये मोजावे लागणार
केंद्र सरकारने 30 ऑगस्ट रोजी देशातील सामान्य जनतेला महागाईपासून मोठा दिलासा देत 14.2 किलो वजनाच्या घरगुती गॅस सिलिंडरच्या किमतीत 200 रुपयांची कपात केली होती.त्याचबरोबर व्यावसायिक एलपीजी गॅस सिलिंडरच्या किमतीत 150 ते 157 (वेगवेगळ्या शहरांमध्ये) रुपयांची कपात केली होती. त्यामुळे घरगुती गॅस सिलिंडरची किंमत 1103 रुपयांवरून 903 रुपये इतकी कमी झाली. तर व्यावसायिक गॅस सिलिंडरची किमत 1635 रुपयांवरून 1482 रुपये इतकी कमी झाली होती. आता यात 209 रुपयांची वाढ झाल्यानंतर याच सिलिंडरसाठी 1,731 रुपये मोजावे लागणार आहेत.
