४४३५ सहायक प्राध्यापकांची लवकरच भरती
मुंबई (प्रतिनिधी)-
अशासकीय अनुदानित महाविद्यालयातील सहायक प्राध्यापकांची ४ हजार ४३५ रिक्त पदे भरतीसाठी प्रस्ताव वित्त विभागाकडे पाठवण्यात आला आहे. त्रुटींची पूर्तता करुन लवकरच भरतीला गती देण्यात येईल, अशी माहिती उच्च आणि तंत्रशिक्षण मंत्री चंद्रकांत पाटील यांनी विधान परिषदेत दिली.
विधान परिषद सदस्य जयंत आसगावकर यांनी प्राध्यापकांच्या रिक्त जागा तात्काळ भरण्याबाबत लक्षवेधी सूचना मांडली होती. यावेळी चर्चेला उत्तर देताना भरतीत पारदर्शकतेसाठी राज्यपालांनी स्थगिती देऊन बदल सूचवले होते. आता ही स्थगिती उठविल्यामुळे छाननी करून पारदर्शक भरती प्रक्रिया राबविली जाणार आहे, असे पाटील यांनी सांगितले.
नवीन राष्ट्रीय शैक्षणिक धोरणानुसार सुधारित पदवी आणि पदव्युत्तर अभ्यासक्रमांची अंमलबजावणी करताना वर्कलोडमध्ये बदल होणार आहे. अकृषि विद्यापीठे, अभिमत विद्यापीठांसाठी मंजूर शिक्षक आणि समकक्ष पदे अशा एकूण पदांपैकी ८० टक्के मर्यादेत ६५९ पदे जाहीरात देऊन भरली जाणार आहेत. प्राचार्य पदभरतीसाठी ‘ना हरकत प्रमाणपत्र’ देण्याचा सामान्य प्रशासन विभागाकडील अधिकार आता पूर्वीप्रमाणेच सहसंचालकांना देण्यात येणार असल्याचेही चंद्रकांत पाटील यांनी सांगितले.
