चाळीसगाव ः प्रतिनिधी
येथील पोलीस स्टेशनच्या हाकेच्या अंतरावर असलेल्या क्रिश वाईन शॉपवर काल मध्यरात्रीनंतर १ वाजेनंतर अज्ञात चोरट्यांनी अंदाजे ५० लाखाच्या आसपास दारूचे व बियरचे खोके दारू लंपास केल्याचे दुकान मालक दिनेश राजकुमार नोतवाणी व कामगार विजय पाटील यांनी ‘साईमत’ ला माहिती दिली.
या धाडसी चोरीमुळे शहरातील व्यावसायिकांमध्ये खळबळ उडाली आहे.पोलीस स्टेशनच्या हाकेच्या अंतरावर हे वाईन शॉप असूनही एवढी मोठी धाडसी चोरी करुन चोरटे पसार झाले.तरी पोलीसांना चाहूल लागली नाही याबद्दल आश्‍चर्य व्यक्त केले जात आहे.चोरी करतांना पोलिसांना कोणतेही पुरावे मिळू नयेत म्हणून चोरट्यांनी क्रिश वाईन शॉपसह आजूबाजूच्या दुकान परिसरातील सीसीटीव्ही कॅमेरे व त्यातील फुटेजही पळवल्याचे वृत्त आहे.
चोरट्यांचा शोध घेण्यासाठी सदर घटनाच्या ठिकाणी पोलिसांनी डॉग पथक पाचारण केल्याचे सांगण्यात आले.चाळीसगाव शहर पोलीस स्टेशनचे कर्तव्यदक्ष पोलिस निरीक्षक विजयकुमार ठाकूरवाड,सहायक पोलिसनिरीक्षक, पोलीस पथक तपास करत आहेत. उशिरापर्यंत गुन्हा दाखल करण्याचे काम सुरू होते.
