लाडक्या बहिणींच्या खात्यात फेब्रुवारीचा
हप्ता जमा होण्याला प्रारंभ
मुंबई (प्रतिनिधी)-
जागतिक महिला दिनाचे औचित्य साधून लाडक्या बहिणींच्या खात्यात फेब्रुवारी महिन्यातील हप्ता जमा होण्यास सुरुवात झाली आहे. फेब्रुवारी आणि मार्च महिन्याचा हप्ता एकत्र येईल, असे राज्य सरकारकडून सांगण्यात आले होते. मात्र, महिलांच्या खात्यात १५०० रूपये जमा झाले आहेत. त्यामुळे संभ्रम असून मार्चचा हप्ता कधी येणार? असा प्रश्न विचारला जात आहे.
आता याबाबत महिला व बालकल्याण मंत्री आदिती तटकरे (यांनी पोस्ट करत माहिती दिली आहे. मंत्री आदिती तटकरे यांनी म्हटले आहे की, लाडकी बहीण योजनेतील पात्र लाभार्थीना फेब्रुवारी व मार्च महिन्याचा निधी वितरित करण्याची प्रक्रिया ७ मार्चपासून सुरू झालेली आहे. ही प्रक्रिया १२ मार्चपर्यंत सुरू राहणार असून सर्व पात्र लाभार्थ्यांच्या बँक खात्यात फेब्रुवारी महिन्याचे १५०० रुपये व मार्च महिन्याचे १५०० रुपये असे दोन टप्प्यात ३००० रुपये जमा करण्याची प्रक्रिया युद्धपातळीवर सुरू आहे. सर्व लाभार्थ्यांना दोन्ही महिन्यांचा लाभ मिळणार असून लाडक्या बहिणींनी निश्चिंत रहावे” असे त्यांनी सांगितले.
लाडकी बहीण योजनेत फेब्रुवारी आणि मार्च महिन्यांतील तीन हजार रुपये एकत्रित देण्याचे सांगण्यात आले होते. त्यानुसार हप्त्यांचे वाटप सुरू करण्यात आले आहे. २ कोटी ५२ लाख महिलांच्या खात्यात शुक्रवारी सायंकाळपासून पैसे जमा करण्यास सुरुवात झाली आहे.
‘मुख्यमंत्री माझी लाडकी बहीण’ योजनेत लाभार्थींना २१०० रुपये देण्याचे आश्वासन महायुतीने दिले असले तरी जाहीरनामा पाच वर्षांसाठी असतो, असं सांगत योग्यवेळी अनुदानात वाढ करण्याचा निर्णय घेतला जाईल, असे मंत्री आदिती तटकरे यांनी विधान परिषदेत स्पष्ट केले. त्यामुळे लाडक्या बहिणींच्या २१०० रुपये देण्याबाबत निर्णय कधी होणार? याकडे लाडक्या बहि‍णींचे लक्ष लागलेलं आहे.
