मेडिसीन डिलर्स असोसिएशनच्या अध्यक्षपदी भंगाळेे; सचिव झंवर

जळगाव ः प्रतिनिधी
जळगाव जिल्हा मेडिसीन डिलर्स असोसिएशनची वार्षिक सर्वसाधारण सभा नुकतीच पार पडली. बैठकीत संघटनेची निवडणूक न करता अध्यक्षपदी सुनील भंगाळे यांची सहाव्यांदा निवड करण्यात आली. तर सचिवपदी अनिल झंवर व कोषाध्यक्षपदी शामकांत वाणी यांची एकमताने बिनविरोध निवड करण्यात आली.
बैठकीत केमिस्ट संघटनेच्या २०२०-२०२३ या पुढील तीन वर्षासाठी नवीन कार्यकारिणीची निवड करण्याच्या विषयावर चर्चा करण्यात आली. संघटनेचे ज्येष्ठ सभासद राजाभाऊ काबरा, मोहसिनभाई करमपूरवाला यांच्या शिष्टाईच्या माध्यमातून आणि संकल्पनेतून यावर्षी निवडणूक न घेता एकमताने निवड करण्याचा निर्णय घेण्यात आला. भंगाळे हे गेल्या पंधरा ते सोळा वर्षांपासून अध्यक्षपदावर विराजमान आहेत. सभेत १४ विषयांना एकमताने मंजुरी दिली. सभेला जिल्हाभरातील ९०० सभासद उपस्थित होते.