जळगाव : प्रतिनिधी
शिर्डी येथून आईला भेटण्यासाठी दुचाकीने घरी परतणार्या पोलीसाचा अपघातात दुर्दैवी मृत्यू होण्याची घटना आज पहाटे शिरसोली रोडवरील देवकर महाविद्यालयाच्या समोर घडली. या अपघातातील दुसरा पोलीस कर्मचारी गंभीर जखमी झाला असून त्याला खाजगी रुग्णालयात उपचारार्थ दाखल करण्यात आले आहे.
या घटनेचे वृत्त असे की, सागर रमजान तडवी (वय ३०, रा.हंबर्डी, ता.यावल, ह.मु. पोलीस लाईन, जिल्हापेठ, जळगाव) हे पोलीस कर्मचारी असून अगोदर रामानंदनगर पोलीस स्टेशनला कार्यरत होते. जळगावात ते आईसोबत राहात होते. काही महिन्यांपूर्वी त्यांची शिर्डी येथील देवस्थानाला पोलीस बंदोबस्त म्हणून नेमणूक करण्यात आली होती. आईला भेटण्यासाठी ते दर आठवड्याला जळगावात येत होते. काल मध्यरात्रीच्या सुमारास पोलीस कर्मचारी संतोष बोरसे यांच्यासह सागर तडवी दुचाकी (क्र.एम.एच.१९-डीएल.५३७०) जळगावला येण्यासाठी निघाले होते. आज पहाटे ५.३० वाजेच्या सुमारास जळगाव-शिरसोली रस्त्यावरील देवकर वैद्यकीय महाविद्यालयाच्या जवळ त्यांच्या दुचाकीस अज्ञात वाहनाने जोरदार धडक दिली. हा अपघात इतका भीषण होता की, सागर तडवी यांचा त्यात जागीच मृत्यू झाला तर सोबत असलेले पोलीस कर्मचारी संतोष बोरसे हे गंभीर जखमी झाले. त्यांना तातडीने उपचारार्थ खाजगी रुग्णालयात दाखल करण्यात आले. तर मयत सागर तडवी यांचा मृतदेह शवविच्छेदनासाठी जिल्हा सामान्य रुग्णालयात आणण्यात आला असून या प्रकरणी एमआयडीसी पोलीसात अकस्मात मृत्यूची नोंद करण्यात आली असून पुढील तपास पीएसआय रामकृष्ण पाटील हे करीत आहेत. दरम्यान, मयत सागर तडवीच्या पश्चात आई, दोन विवाहित बहिणी असा परिवार असल्याचे समजते.
