अमळनेर : प्रतिनिधी
अमळनेर-धरणगाव दरम्यान भोणे गावानजीक आज सकाळी अहमदाबाद हावडा एक्सप्रेसला ट्रकने धडक दिल्याने झालेल्या अपघातात रेल्वे डब्यातील काही प्रवासी जखमी झाल्याची घटना आज सकाळी घडली. या अपघाताची माहिती मिळताच रेल्वे प्रशासनाचे अधिकारी तत्काळ घटनास्थळी दाखल झाले होते.
याबाबत मिळालेले वृत्त असे की, पश्चिम रेल्वेच्या अंतर्गत येणार्या अमळनेर-धरणगाव दरम्यान रेल्वे प्रशासनाचे रेल्वे रुळांचे काम सुरु आहे. या कामात रेल्वे रुळा शेजारुन ट्रकने रुळाच्या कामांच्या अंतर्गत असणार्या साधनसामुग्रीची वाहतूक केली जाते. आज सकाळी या कामासाठी जात असलेल्या ट्रकवरील चालकाचे नियंत्रण अचानक सुटल्याने हा ट्रक अहमदाबादहून हावड्याकडे जाणार्या हावडा एक्सप्रेसला जावून धडकला. झालेल्या अपघातात रेल्वेचे काही प्रवासी जखमी झाल्याचे वृत्त असून मोठा अनर्थ टळल्याचे प्रत्यक्षदर्शी सांगतात. शेवटचे वृत्त हाती आले तेव्हा रेल्वे प्रशासनाकडून तात्काळ कारवाई करत क्रेनच्या सहाय्याने ट्रकला अपघात स्थळावरुन बाजूला करण्यात आले असून हावडा एक्सप्रेस हा पुढील प्रवासासाठी जळगावकडे रवाना करण्यात आला असल्याचे वृत्त आहे.
