अवैध गॅस रिफीलिंग; १३ सिलिंडर्स जप्त
जळगाव (प्रतिनिधी)-
घरगुती वापराच्या गॅस सिलिंडरमधून रिक्षात अवैध गॅस रिफीलींग करणाऱ्यावर गस्तीवर असलेल्या स्थानिक गुन्हे शाखेच्या पथकाने छापा टाकला. १३ भरलेले व ५ रिकामे सिलिंडर्स जप्त करण्यात आले.
या कारवाईत आफताब आलम शेख रहीम (२८, रा. रहमतपूर नशिराबाद) विरुद्ध शुक्रवारी मध्यरात्री गुन्हा दाखल करण्यात आला.
स्थानिक गुन्हे शाखेतील पोलीस उपनिरीक्षक शरद बागल, पोहेकॉ कमलाकर बागुल, गजानन देशमुख, गोपाळ गव्हाळे, संघपाल तायडे, सचिन पोळ यांचे पथक रात्री गस्तीवर होते. त्यांना नशिराबाद पोलीस ठाण्याच्या हद्दीत अवैध घरगुती गॅस सिलिंडरमधून प्रवासी रिक्षा रिफिलींग करतांना दिसले. रिक्षा चालकास कुणकूण लागल्याने तो अंधाराचा फायदा घेऊन पळून गेला. त्यानंतर पथकाने छापा टाकला आफताब शेख हा वाहनात गॅस भरतांना मिळून आला.
पथकाने संशयिताला ताब्यात घेतले मालवाहतूक वाहन व तेरा भरलेले गॅस सिलिंडर्स, पाच रिकामे यासह गॅस भरण्याचे साहित्य असा ३ लाख ९६ हजार १५० रुपयांचा मुद्देमाल जप्त केला. नशिराबाद पोलीस ठाण्यात गुन्हा दाखल करण्यात आला आहे.
